Degmada Gaalkacyo oo Ku Yeelata Kulan Bulshada oo ku Saabsan Arrimaha Dhulka

Maamulka degmada Gaalkacyo ee Dowlad Goboleedka Galmudug ayaa qaban qaabiyay kulan laba maalmood ah oo looga hadlayo arrimaha dhulka iyo horumarinta magaalada. Kulanka waxaa ka soo qeyb galay duqa degmada, Abdiraxmaan Sheekh Xasan Jimcaale, xubnaha golaha deegaanka, wakiillada bulshada, injineerada, khubaro dhuleed, odayaasha, aqoonyahanada, ganacsatada, haweenka iyo ururada dhalinyarada.
Diiradda kulanka ayaa ah in la sameeyo qorshe mideysan oo lagu maamuli doono arrimaha dhulka Gaalkacyo, xalinta khilaafaadka dhulka, ilaalinta waddooyinka magaalada, iyo kor u qaadista nadiifadda iyo qurxinta degmada. Duqa Cabdiraxmaan Sheekh Xasan Jimcaale ayaa ku adkeeyay muhiimadda ay leedahay in la xaliyo arrimahan muhiimka ah mustaqbalka bulshada.
Kulanka furitaankiisii, duqa ayaa soo bandhigay sadex arrimood oo muhiim ah: maamulka dhulka, ilaalinta waddooyinka, iyo qurxinta magaalada. Wuxuu ku dhiiri galiyay in la iskaashado oo la wada shaqeeyo dhinacyada kala duwan si loo helo xal waara.
Ka qeyb galayaashii ayaa ka qeyb qaatay doodaha, waxayna ku soo bandhigeen aragtidooda ku saabsan qodobadii la soo jeediyay. Maalintii kowaad ee kulanka ayaa ku dhammaatay wadahadalada furan, waxayna u diyaar garoobeen doodaha iyo go’aamadeynta maalintii xigga.
Talaabadani ay qaaday maamulka degmada ayaa muujineysa go’aankoodii in la qeyb galiyo dhammaan dhinacyada bulshada si loo xaliyo baahiyaha degaanka Gaalkacyo. Iyagoo ka faa’iideysan aragtida dhinacyada kala duwan, maamulku wuxuu doonayaa in uu sameeyo qorshe dhammaystiran oo ku saleysan xuquuqda dhulka, qorsheynta magaalada, iyo horumarinta bulshada.