Wasaaradda Waxbarashada iyo Tacliinta Sare ee Xukuumadda Federaalka Soomaaliya waxay qabatay talaabo muhiim ah oo looga gol leeyahay inay kor u qaaddo aqoonta iyo xirfadaha gabdhaha Soomaaliyeed, waxayna bilowday mashruuc deeq waxbarasho oo loogu talo galay inay ka faa’iidaan 3,000 oo gabdhood dhallinyaro ah. Mashruucan wuxuu u hirgelin doonaa fursado tababar xirfadeed oo kala duwan gabdhahaan.
Munaasabadda lagu soo bandhigayay deeqdaan waxbarashada gabdhaha waxaa ka qayb galay Wasiirka Wasaaradda Waxbarashada, Wasiir Dowlaha, Xoghayaha Joogtada ee Wasaaradda, Xildhibaano, Agaasimaha Agaasimka Waxbarashada Gobolka Banaadir, Guddoomiye ku-xigeenka Arrimaha Bulshada Gobolka Banaadir, wakiillo ka socday jaamacadaha dalka iyo marti sharaf kale.
Xoghayaha Joogtada ee Wasaaradda Waxbarashada Hassan Mohamed Ali iyo Asha Mohamed Hassan oo ah madaxa mashruuca Rajakaaba, ayaa sheegay muhiimadda mashruucan oo loogu talo galay inuu fursado waxbarasho u siiyo 3,000 oo gabdhood Soomaaliyeed oo raba inay ka faa’iidaan barnaamijkan. Deeqdan waxay qusaysan doontaa arrimaha caafimaadka, waxbarashada iyo tababarada xirfadaha kale.
Mashruuca Rajakaaba waa hay’ad dhinacyo badan leh oo loogu talo galay inay kor u qaaddo aqoonta iyo xirfadaha gabdhaha, haweenka iyo dhallinyarada. Mid ka mid ah qaybahaas mashruucan waa inay gabdhaha iyo haweenka lagu tababaro xirfado nololeed muhiim ah.
Mohamed Yusuf Nur oo ah Agaasimaha Agaasimka Waxbarashada Gobolka Banaadir iyo Abdiasis Osman oo ah Guddoomiye ku-xigeenka Arrimaha Bulshada ee Gobolkaas, ayaa soo dhaweeyay fursadda ay 3,000 oo gabdhood ay helayaan deeq waxbarasho, iyagoo sheegay inay tahay maalin farxad leh.
Xildhibaan Nadia Salah iyo Wasiir Dowlaha Wasaaradda Waxbarashada Nur Mustafa Mukhtar ayaa xusay in mashruucan uu ka faa’idaysan doono 3,000 oo gabdhood, iyagoo tilmaamay muhiimadda waxbarashada.
Ugu dambayntii, Wasiirka Wasaaradda Waxbarashada Faarax Sheekh Cabdulqaadir ayaa sheegay in siidaynta fursadaha waxbarashada ee 3,000 oo gabdhood ay tahay arrin muhiim ah, waxayna u baahan yihiin inay ka faa’iidaan sidii loogu talo galay.
